चिप्लेढुङ्गा – गण्डकी प्रदेशका आर्थिक मामिला तथा योजनामन्त्री किरण गुरुङले उजुरी पर्दैमा भ्रष्टाचार भयो भनेर बुझ्नु नहुने बताउनुभएको छ । नेपाल आर्थिक पत्रकार समाज (सेजन)ले आज पोखरामा आयोजना गरेको सार्वजनिक वित्तीय व्यवस्थापनसम्बन्धी अन्तक्र्रियामा उहाँले उजुरीलाई आधार मानेर धारणा बनाउन गलत हुने बताउनुभयो ।
मन्त्री गुरुङले भन्नुभयो, “स्थानीय तहमा व्यापक भ्रष्टाचार भयो भनेर समाचार आइरहेका छन्, सतही विषयमा भन्दा गहिरो तरिकाले रिपोर्टिङ गर्दा जनमानसमा पत्रकारप्रति विश्वास बढ्छ, सुशासनका लागि हजुरको भूमिका महत्पूर्ण हुन्छ ।” उहाँले भ्रष्टचार के कारण भएको हो त्यसका कारणको खोजीतर्फ ध्यान दिन आग्रह गर्नुभयो ।
कार्यक्रममा महालेखा नियन्त्रक गोपीनाथ मैनालीले जनताको पसिनाको रकम जनताकै आँशु पुछ्नका लागि भएकाले यसको पारदर्शिता हुनुपर्ने विषयमा जोड दिनुभयो । विधिको शासनभित्र रहेर कति काम भए त्यसतर्फ पत्रकारले ध्यान दिनुपर्ने उहाँको भनाइ थियो । प्रदेश लेखा नियन्त्रक इन्द्रप्रसाद पौडेलले समयमै कार्ययोजना छनोट गर्ने संस्कार नहुँदा र अन्तिममा काम गर्दा नतिजामुखी हुन नसकेको धारणा राख्नुभयो ।
पत्रकार महासङ्घ कास्कीका अध्यक्ष दीपेन्द्र श्रेष्ठले सुशासन, जवाफदेहीता र पारदर्शीताबाट मात्र आर्थिक समृद्धि हासिल हुने भएकाले सार्वजनिक वित्तीय व्यवस्थापनमा सुदृढ हुनुपर्ने बताउनुभयो ।
सेजनका अध्यक्ष भीमप्रसाद गौतमले मुलुकको समृद्धिका लागि आर्थिक मुद्दा पहिलो प्राथमिकता भएकाले सञ्चार जगतले सार्वजनिक वित्तीय व्यवस्थापनको विभिन्न प्रक्रियाका बारेमा बुझ्न आवश्यक रहेको औँल्याउनुभयो । कार्यक्रममा विभिन्न सञ्चारमाध्यममा कार्यरत ३० जना पत्रकारको सहभागिता रहेको सेजनका महासचिव सुजन ओलीले जानकारी दिनुभयो ।
